Act 10 | BEF | STEP | Bo mone Sisalia hepato mino'ehina. Ai gi'a Koniliasi. Ai Lomu gimi bouba 100 gimi bomagi kaba'ani mino'ehina. Ya hu'ehina gimi bomagi nupa hi'ahanamofihi gi'a Itali yabe lite he'ahana.

Acts 10

Agelouba limito Koniliasihitoga kaga molo'ehina

1 Bo mone Sisalia hepato mino'ehina. Ai gi'a Koniliasi. Ai Lomu gimi bouba 100 gimi bomagi kaba'ani mino'ehina. Ya hu'ehina gimi bomagi nupa hi'ahanamofihi gi'a Itali yabe lite he'ahana. 2 Ai mono ka mege'i nomalana bo yabe. Ai hiti lalameha'a hiti asaga'i Hu'mamofitoga enemehi emite mine'ahana. Yuta bona'i luga'a enumuhi meni'ina bona'i Koniliasiu enehe'molata nohuto Hu'mamofitoga amuya moloto nunumu hulata hu'ehina. 3 Utehi yege liyofo nohigo bamu'i bu go'ehina. Ai ana bamulugu Hu'mamofihi agelouba nonugu tito ma luto lu'ehina: Koniliasio. 4 Ya ligo Koniliasiu bu goloto koli huto loka ho'ehina: Sipi Bo, hena hibe? Ya ligo agelouba Koniliasihi lu emi'ehina: Asaga hetofa foya suhi nohatana'mu luto Hu'ma ekesu mehago nunumuka keheligo bati hu'ehibe. 5 Ya hu'ehinagi yatai bona'i mone'a enoho lifitogo bo mone gi'a Simoni Pita yabe luto gi'a ni'ina bo Yopa hepato nohinaga bino. 6 To ai Simoniu yaga gufa'atu gukete hetilata bo hege nagami beletoga nominana bo hiti moneka neha'ibe. 7 Agelouba ya luto lu emiloto i fenene hu'ehina. Ya hulago Koniliasiu koko pana'a hiti gimi bo mone hiti kehe i'ehina. Ya'ma gimi bouba Koniliasi hiti moneka humofa'na nohuto ai mono ka mege'i nomalana bo yabe. 8 Koniliasiu asaga'na bulo hu'ehinanamofihi ya'mana loegi monegi bomagihi hu hokolo huto lu epiloto enoho lifigo Yopa hepatoga bi'ahana yabe.

9 Eteka'a enali kapo melete bite Yopa hepa lebato henetigo Pitau fuligaha kana'alo nohupitalo minoto nunumu hilube'mu ti'ehina. 10 Ai kau'na sipi hago nose'na nalube'mu nohuto yuhufa nogoto laita nohuto bamu'i mone bu go'ehina. 11 Ai kokuluma'i i hokolo nohigo analugati sipina mone nasana kata legi huto nekisa'alo loegi loegi ni'inalo naga'i luga luga gi hepila gi hepila hite sa gi'ahanana melugu limi'ehina. 12 Ana sagu yagakafa lumo lumofi osifa'ifi lopi namafi fato fato'i mino'ehina. 13 Ya nohigo nogo moneuba ma luto lu'ehina: Pitau, ho tito enohoto nobo. 14 Ya ligo Pitau ana kagalo nona'a ma luto lu'ehina: Sipi Bo'ni, o'e. Koyapa'i keya kagu nose'na kolo tanana hiti to lu laga hi'ahana hiti mo sibo luto nose'na ni'ibe. Nani ya'mana nose'na mo sito menonana nose'na ni'ibe. 15 To Pitau ya noligo ana nogouba aku'i ma luto lu emi'ehina: Hu'mau nalo luto molo'ehina nose'na kai mo sise nose'na ni'ibe luto melubo. 16 Ana nogouba loegi monegi yupahi ya luto lulago ana sa gi'ehinana kokulumalugu aku ti'ehina.

17 To Pitau hena huse bamu'i bu gofi luto ekesa yigi babu lu'ehina. Ya nohigo Koniliasiu enoho lifi'ehina bona'i Pita nohina nohi sa sa hite be gelete bite kasihi fegutoga mine'ahana. 18 Enali kehe ite enoloka he'ahana: Simoni Pita maga nohifi menohibe? 19 Pitau ana bamu'mofihi hapa'amu ekesa yigiba yigiba nohigo Sikalafu'uba ma luto lu'ehina: Kai kehelibo. Loegi monegi bomagi kai kumu lite sa nehabe. 20 Ya nehanagi kai ho tito limito enebe tigito moneka bilo. Kai kekesa loe lae meyigibo. Ya'mana bona'i nani'ni enoho lifi'ohube. 21 Ya lulago Pitau ya'mana bo nehanalo limiloto ma luto lu epi'ehina: Nani kumu sa sa nehanamo maga nohube. Lenali henabe lite e'ahabe? 22 Ya ligo enali lu emi'ahana: Koniliasiu sipi gimi bouba loho lifigo o'ohune. Ai Hu'mamofitoga komopa'a emito nominago Yuta bona'magi koyone hine emina bo yabe. Kai kaga lu emitogo kehelilibe luto Hu'mamofihi agelo'a moneuba Koniliasihi nonuga bilane luto kehe igo noone. 23 Ya lite lago Pitau lu epi'ehina: Nonuga tilo. Lali koloto yago etehi bilune.

Ya luto ligo kelete eteka'a ho tilete kapo melete nebago Yopa bona'i luga'amagi enemege'i melete bi'ahana yabe. 24 Enali kapo melete bite kapogu nohi mone kelete eteka'a Sisalia hepalugu heneti'ahana. To Koniliasiu naga'a yagi to gufalo lalu'agi luga'a hiti ai hepa'alo enele'mo nupa higo enegeba hite mine'ahana yabe. 25 Pitau Koniliasihi noho kasito buho notigo Koniliasiu bu goloto gigusagu lipito koto be tigi'ehina. 26 Ya higo Pitau le'mo ho tiloto ma luto lu emi'ehina: Nani asaga bona'i nehana'a huto fa'mene bo nohube. 27 Ya luto luloto Koniliasihi noha'a luga netite Pitau kaga lu emimo lu emimo tiloto babu bona'i li nupa hite nehago Pitau bu enogo'ehina. 28 Ya huloto ma luto lu epi'ehina: Lenalitini akeheli'ahabe. Yuta bo moneuba fato naga'i hiti koguna ito minose'namoya lusiga luto o'e lite Yuta bona'magi lu laga hi'ahanamo ni'ibe. Ya hu'ehinamoya Hu'mau ma luto nelepi'ehibe: Bo mone'mofihi kolo tana bo yabe lula to kolo metana bo yabe lula mehubo. 29 Ya luto lu'ehigo nani kaga'a pelesa meise ai nogo'a liyafa huto noobe. Ya'mu luto nani yatai lenoloka nohobe. Lenali hena hibe lite nani'i kehe i'ahabe?

30 Ya ligo Koniliasiu ka'alo nona'a lu'ehina: Ya'ma kanalo utehi noligo ologo noha'nigu minoto nunumu hu'ohuna yabe. Ya nohugo gulu gulu gukete hekolose bo mone nubuloga oto ho ti'ehina. 31 Ya huloto ma luto lu'ehina: Koniliasio. Asaga bona'i enumuhi meni'inamagi enehe'moto enele'mo bati hulata nohatamolo Hu'mau nunumu ka akeheli'ehibe. 32 Ya hu'ehinagi Yopa hepato bo mone Simoni Pitau yabe luto nohinamofitoga bona'i enoho lifitogo bino. To ai Simoniu yagakafa gufa'a gukete hetilata nohina bomofi hiti hege nagami beleto nemina'ibe. 33 Ya'mu luto kaitoga mele'isi enoho lufugo bi'ahanamo kai bati huto a'noane. To Sipi Bouba lu kabagalo melenogo lilata kaga lali kehelilune luto Hu'mamofihi bulo li gehesa huto nohune luto Koniliasiu Pitahi lu emi'ehina yabe.

Pitau Koniliasihi nonugu kaga lu yege ho'ehina

34 Pitau hapi fito kaga lu'ehina: Yatai keheli fotogo nohuto ma'naka luto Hu'mau bona'i moneko legege hite nehabe luto kehelilata nohibe. 35 Ai'i agoya hu emite bebe sana suhi hilata nehana bona'i asaga'i nupa bofi safa bofi Hu'mau keheli bati hu epololata nohibe. 36 Isilaeli bona'i koguna ite fulunaguti minalabe luto asaga bona'magihi Sipi Bo'ani Yesu Kilisitotoga ka lamana'a malago limi'ehina kaga, lenali kehelilata nehabe. 37 Galili hepatoti hapi filoto Yutia kegi'a bu baga igo sipina Yoniu nagami'i fololoto li huto hinana lenali kehelilata nehabe. 38 Yesuhi Nasalete bomofitoga Hu'mamofihi Sikalafu'auba amuya emi'ehinamofihi lenali nekehelibe. Ai asaga kapoga bula ola huto hetofa suhi huto Satau naga'i epi'ehina bona'i enele'mo gulu ho'ehina. Hena'mugope Hu'mau ai hiti moneka nohigo yabe. 39 Asaga'na Yuta kegi'afi to Yelusale hepatogafi Yesu li huto hu'ehinanamofihi kaga lali bu go'ohutamo lu yege nohone. Enali malipu yafalo ho fili'ahana yabe. 40 Ya hago loegi monegi yupahi Hu'mau fili'ehinagati le'mo ho tigo huto hu'ehina yabe. 41 Silaga bona'i be mege'ahana lalisigo Hu'mau ai le'mo ho ti'ehina bomofi kumu luto bu go'ohutoti yabe. Hu'mau kene keliguti le'mo ho tilago ai hiti nose'na moneka no'ohune. 42 Filise bona'ifi to kosaba bona'ifi enali kaga'ani loko hu epalalina bo Hu'mau le'mo ho ti'ehina'mu luto loho lifigo lu yege nohone. 43 Asaga'i kaga lu yege hose bomagi Yesu ai kumu kaga ma lite li'ahana. Enali aitoga komopa'ani malalanamagihi foipana'ani ai gi'alo linogoti li he'mi epalalibe.

Fegutoga bona'magi Sikalafu'i li'ahana

44 Pitau kaga lu epito nohigo ai kaga'a kehelite minana bonatoga Sikalafu'i limi'ehina yabe. 45 Yuta bona'i Hu'mamofitoga komopa'ani emise bona'i luga'a Yopa hepatoti Pitahi mege'i e'ahanamagi fegutoga bona'magitoga Hu'ma fokehena Sikalafu'i epina be gelete topa he'ahana yabe. 46 Enali fegutoga bona'magi fato fato nogo hite Hu'mamofitoga enegelo bi emite fokehi hana kehelilete yabe. Ya hago Pitau lu epi'ehina: 47 Ma bomagi lali li'ohuta suhi lite Sikalafu'i li'ahabe. Nagami'i mefalalo luto bo moneuba laga hu epalalina ni'ifihe? 48 Ya luloto lu epi'ehina: Lenali Yesu Kilisitohi gi'alo nagami'i falalo. Ya lulago alihi ana bona'magi lali hiti nesi kana minoto bilane lite Pitahi le'mo mele'ahana yabe.